editorial

Iniciamos este ano de 2015 con dúas magníficas novas. Por unha banda, a incorporación da nosa revista á DBLP, a prestixiosa base de datos bibliográfica do ámbito das ciencias da computación mantida por Michael Ley na Universidade de Trier. Pola outra, a aceptación recibida da inclusión de Linguamática na importantísima base de datos de bibliografía científica de Scopus mantida por Elsevier, inclusión pendente da completa indización dos contidos da revista por parte da editora. O noso obxectivo é seguir facendo desta revista o marco científico máis acaído para o envío de artigos de alta calidade no eido do procesamento das linguas ibéricas, e con ese obxectivo traballamos arreo para lograr tamén que a Linguamática sexa incluída nos índices bibliográficos principais a nivel local e internacional. Porén, tamén nos parece relevante anovar e mellorar continuamente o deseño da revista e, neste senso, introducimos neste número unha nova portada de estilo actualizado e un formato renovado dos artigos da revista que inclúe útiles enlaces nas citas e nos URL na súa versión PDF. Esperamos poder seguir ofrécendovos esta revista cada vez con mellores características e agradecemos sempre a vosa participación e a vosa vontade que divulgar os vosos traballos en Linguamática.